Sibba Stef

Námaskarð

2011-01-11T15:53:00.000-08:00

Húfa: Kolaportið
Samfella: Warehouse
Hálsmen: Kolaportið
Buxur: Ilse Jacobsen
Skór: Bossanova

Þrátt fyrir að hafa byrjað í skólanum á mánudaginn og eiga fjóra mánuði af striti og puði framundan vil ég bara sumarið, núna.
Ég hef aldrei verið janúar-febrúar-mars manneskja, en það rofar til í apríl. Kannski því þá er afmælið mitt og vorið komið á skrið.

Myndirnar hér fyrir neðan eru frá Námaskarði síðasta sumar.
Umhverfi sem hentar best vísindaskáldsögu. (smellið á "read more" fyrir fleiri myndir.)

Þrettándinn.

2011-01-06T15:32:00.001-08:00

(1, 3, 5, 7, 8, hinar eru frá mér.)

Tvöþúsund og ellefu.

2011-01-02T15:52:00.000-08:00

Slaufa: Fatamarkaður
Kjóll: Nostalgía
Næla: Kolaportið

Mér finnst orðið jafn leiðigjarnt að heyra um áramótaheit og um það hversu leiðinleg áramótaheit eru svo ég er í hálfgerðum bobba.
En ég hef ákveðið að ég ætla að gera allt nákvæmlega eins og ég gerði á síðasta ári nema tíu sinnum betur. Allt frá smámunum eins og að halda áfram að velja vatn fram yfir kók yfir í að ferðast um Ísland, bara ennþá oftar.
Því hef ég engin háleit plön fyrir árið 2011 og vona því að ævintýrin komi til mín því ég nenni ekki að plana þau sjálf. Eins og er.

Gleðileg Jól

2010-12-25T15:48:00.000-08:00

Rósir: Mega Store
Samfestingur: Spúútnik

Gleðileg jól til allra þeirra sem kíkja hér í heimsókn!
Vona að allir hafi átt stressandi desembermánuð en muni
slappa vel af og lifa í vellystingum milli jóla og nýárs!

Vegaferð: Sumarbústaðurinn

2010-10-13T11:37:00.000-07:00

Peysa: Top Shop
Skyrta: Zara
Kjóll: Vero Moda
Skór: River Island

Ég og kærastinn fórum upp í sumarbústað síðustu helgi.
Lögðum af stað eftir kvöldmat svo þegar við renndum í hlað upp í sumarbústað tók á móti okkur stjörnubjartur himinn. Ég var búin að gleyma hversu fallegar stjörnur eru.

Morguninn eftir lögðum við í góðan göngutúr.
Umhverfið var allt kröggt af lífi, við sáum fugla hópa sig saman í hundraðatali við rætur Heklu og vorum næstum búin að stíga á litla hagamús.

Það eru forréttindi að geta skutlast upp í sumarbústað eftir hentugleika, ég tala nú ekki um til þess að safna orku fyrir viðburðaríka Airwaves viku!

Fimm myndbönd

2010-10-07T16:24:00.000-07:00

1. Style Like U
Er eitt það gáfaðasta sem tískumeðvitað fólk getur eitt tíma sínum í á internetinu.
Þar er skyggnst inn í fataskápa misáhugaverðs fólks.

Amber Doyle
Emily Bartley
Oliver Short og Kira Panfilova
Elisa Palomino

2. The Misbehavers
Herbergi Robert Rodrigues í kvikmyndinni Four Rooms er best.

Partur eitt
Partur tvö
Partur þrjú

3. Glæsilegar eldri konur
Eldri konur sem klæða sig eins og þær séu komnar úr sjónvarpsþættinum Absolutely Fabulous eru ástríða mín.
Ég segi þetta með fullri virðingu og aðdáun

Iris Apfel
Irene Williams
Royce

4. Myndbrot frá 1922
Meðal fyrstu myndbrota í lit.

Myndbrotið

5. Alexandra Grecco
Er fatahönnuður sem gerir frábær kynningarmyndbönd fyrir fatalínur sínar.

Haust 2010
Vor 2011

Flugferð: Manchester

2010-09-20T15:42:00.000-07:00

Jakki: Kolaportið
Skyrta: Zara
Buxur: Topshop
Skór: Bossanova

Langt er liðið síðan ég skrifaði hér.
Byrjuð í skólanum og í nýrri vinnu, svo hjól hversdagsleikans er farið í gang.

Er þó nýkomin heim úr helgarferð í Manchester þar sem ég og kærasti minn flúðum raunveruleikann. Verslunarferð og fótboltaferð á Manchester-Liverpool.
Ein mesta upplifun sem ég hef notið. Litla Manchester sálin mín frá fótboltaárum mínum í barnsæsku naut sín vel á meðal 75.000 æstra fótboltaaðdáenda.
Og þvílíkur leikur!

Vegaferð: Ísafjörður

2010-08-02T10:39:00.000-07:00

Jakki: Gamall af tengdamóður
Kjóll: Topshop
Skór: Bossanova

Um verslunarmannahelgina fór ég eins og grúppíum sæmir í tónleikaferð með Nolo.
En bestu vinir mínir og jafnframt kærasti skipa þá hljómsveit.
Þeir fóru með Sumargleði Kimi Records til Hólmavíkur og Ísafjarðar frá fimmtudegi til föstudags,
en á laugardeginum var brunað í bæinn til að spila á Innipúkanum.

Ef það hefði gefist tími hefði verið gaman að taka þátt í Mýrarboltanum og njóta þessi að vera á Vestfjörðum í veðurblíðunni.
Þýðir ekki að fást um það, en hversu svalur er rauði leðurjakkinn?
Fann hann í kompunni hjá kærasta mínum, móðir hans átti hann þegar hún var ung!

Vegaferð: Vík í Mýrdal

2010-07-27T08:21:00.001-07:00

Kjóll: Gamall af móður minni
Skór: Bossanova

Eyddi síðustu helgi á ættarmóti í Vík í Mýrdal hjá ættlegg kærasta míns.
Ég ráðlegg þeim sem þjást af krónísku svefnleysi að gista eina nótt í Vík.

Cher

2010-07-17T13:02:00.000-07:00

Cher var tignarleg á sjöunda og áttunda áratugnum.

Vegaferð: Færeyjar

2010-07-12T17:35:00.001-07:00

Er búin að ferðast hringinn í kringum landið með viðkomu í Færeyjum.
Fór þangað að vitja ættingja sem ég hafði aldrei séð né heyrt af þar til nú.
Ég er nefnilega blendingur, einn fjórði Færeyingur, og fannst mér tími til kominn að blessa ættarmót í Porkeri á Suðurey með nærveru minni.

Ákveðið var að ferðast upp á gamla mátann, fara með skipi út á Atlanthafið.
Þar sem Norræna fer frá landi á Seyðisfirði byrjaði ferðalagið á hringvegi Íslands.
Mér finnst það bara vera órituð lög að hver sá sem fer ekki hringinn í það minnsta á fimm ára fresti skuli ei Íslendingur kallast.

En ég fer ekki fullnægð hringinn nema ég geri eitthvað af neðantöldu:
Í sumarsól rölta frá Frúin í Hamborg yfir í Brynjuís og þaðan með bíl í Jólahúsið
Stoppa og dást að Goðafossi.
Ganga Kirkjuhringinn í Dimmuborgum og borða Dimmuborgara eftir á.
Sjá fegurðina í Námaskarði.
Eiga sumarkvöld á Eiðum.
Stara á Jökulsárlón.
Gista eina nótt á Eddu Hóteli hvar sem er á landinu.
Ganga að Svartafossi í Skaftafells Þjóðgarði.
Vaða varlega í fjörunni í Vík í Mýrdal.
Tjalda í Hömrum í Kjarnaskógi eða í Vaglaskógi.

Eftir sextán klukkutíma bátsferð í Norrænu, annarri tveggja klukkutíma bátsferð með Smyrli og stuttum akstri síðar vorum við komin aftur í tímann.
Porkeri, lítið þrjúhundruð og eitthvað manna þorp þar sem kindur vappa um í bakgarðinum.
Klukkan gengur hægar í Færeyjum, fólk læsir ekki útidyrahurðum og það leggur ekki einbreiðar brýr heldur einbreiða vegi.

Ættin mín í Færeyjum syngur meira að segja.
Og fólk sem þekkir mig þekkir andúð mína á því að hefja raust mína.

Vegaferð: Stykkishólmur

2010-06-22T12:14:00.000-07:00

Sólgleraugu: Ebay
Eyrnalokkar: Etsy
Hálsmen: Etsy og Kolaportið
Peysa: Fatamarkaður
Kjóll: Warehouse
Skór: Fatamarkaður

Útlönd hvað?
Þegar maður getur ferðast um Ísland. Á rándýrum bensínlítra þó.

Júní.

2010-06-21T17:01:00.000-07:00

17. júní.

2010-06-17T17:14:00.000-07:00

Upphlutur og skyrta: Eign mömmu
Leðurstuttbuxur: Spúútnik

Átti ánægjulegan dag þrátt fjögra tíma svefn nóttina áður.
Seinustu þrír dagar hafa farið í að undirleggja heimili mitt fyrir veifuframleiðslu í massavís og blómakransagerð.
Ég, ásamt vinkonum mínum ákváðum að skreyta Rútstún í Kópavogi í tilefni af 17. júní með litríkum veifum og körfum fylltum af krítum. Ein okkar valhoppaði svo um ásamt öðrum skvísum með blómakrans á höfði og dreifði sápukúlum til þeirra yngstu og miðum með sætum skilaboðum til þeirra eldri.
Við erum þó ekki snælduvitlausar því þetta var allt gert á vegum Skapandi Sumarstarfa í Kópavogi.

En mikið eigum við fallegan þjóðbúning við Íslendingar. Ef maður sleppir skotthúfunni, pilsinu og svuntunni er hann hámóðins. Þó finnst mér fullorðnu konurnar á 17.júní sem klæðast þjóðbúningnum í allri sinni dýrð vera algjör babe.

Endur og brauð.

2010-06-05T14:37:00.001-07:00

Hattur: Spúútnik
Blússa: Zara
Pils: Fatamarkaður
Sokkabuxur: Cobra
Skór: Fatamarkaður

Fátt segir jafn mikið sumar eins og að rölta um í Grasagarðinum og gefa öndunum brauð.
Aftur á móti má ekki gefa öndunum brauð lengur í garðinum. Ég gaf þeim samt brauð.

Vika er síðan þessar myndir voru teknar, síðan þá hefur mikið vatn runnið til sjávar. Eurovision, ég harma að hafa látið þann trylling hrífa mig með sér, og kosningar. Mér finnst hinsvegar tryllt gaman að kjósa og kosningasjónvarp samsvarar snakki og ídýfu. Ég er með kosningafetish.
Vinnan er komin á skrið, vinn hjá Skapandi Sumarstörfum í Kópavogsbæ, mun sauma í tvo mánuði ásamt öðrum vafasömum hlutum á launum. Hin ljúfa spilling.

Tímavél Tískunnar

2010-05-30T10:50:00.000-07:00

Rataði inn á þessa vefsíðu Sixties & Seventies fyrir einskæra tilviljun eins og vill oft gerast þegar maður vafrar á veraldarvefnum. Og en sú hamingja sem fyllti hjarta mitt að finna þennan hafsjó af ljósmyndum frá sjötta og sjöunda áratugnum. Þarna gefur að líta þekkt andlit í bland við hina tískumeðvituðu alþýðu. Lítið meira hægt að segja án þess að fara út í þvaður, svo smellið og njótið.

Útskrift.

2010-05-22T14:56:00.000-07:00

Eyrnalokkar: Gamlir af Etsy
Kjóll: Warehouse
Sokkabuxur: Cobra
Skór: Bianco

Dagurinn í gær var afturhvarf til ársins 2007.
Kærasti minn útskrifaðist úr Menntaskólanum í Kópavogi við hátíðlega athöfn í Digraneskirkju. Til að fagna þessum áfanga var öllu tjaldað til og fólk kom saman á nítjándu hæð í Turninum í Kópavogi, gladdist og borðaði gullhúðaðann mat*. Svo ég tali nú ekki um ausa yfir hann gjöfum.
Þegar dagurinn var loks á enda var ekki haldið í heljarinnar djamm heldur duttum við bæði dauð niður í kringum eitt leitið. Gamlar sálir hér á ferð, en ætlum að bæta upp fyrir það í kvöld.

Eins og drepið var á í hinum óhugnalega löngu ræðum skólameistara og annarra jafntitlaðra manna, þá eru merkileg tímamót þegar menntaskólaárin eru á enda. Eitthvað svo fullorðins.

Jakkaföt: Herrafataverslun Kormáks og Skjaldar
Skyrta: Herrafataverslun Kormáks og Skjaldar
Bindi: Prjónabindi lánað frá Bróður hans
Skór: Zara

*Djók.

Butch Cassidy and the Sundance Kid.

2010-05-17T09:33:00.000-07:00

Horfði á Butch Cassidy and the Sundance Kid um helgina.
Hún fullnægði mínum kvikmyndaþörfum, jafnt fyrir hugann og augun.
Ekki að eyðileggja að hún er byggð lauslega á sönnum persónum og atburðum.
Butch Cassidy og The Sundance Kid voru foringjar ræningjahópsins Hole in the Wall um aldamótin 1900, sem stunduðu það iðulega að ræna banka og lestir.
Etta Place var fylgikona þeirra félaga og samverka maður í einstökum bankaránum.
Paul Newman, Robert Redford og Katharine Ross gera þau ódauðleg í þessari mynd.
Ég væri alveg til í að ræna einum banka eða tveim með þeim, sérstaklega svona til fara.

Sæt og væmin klippa úr myndinni, þó ekki Titanic væmið.

Gleðilegt Sumar.

2010-05-11T15:03:00.000-07:00

Sólgleraugu: Góði Hirðirinn
Jakki: Kolaportið
Samfestingur: Etsy
Skór: Bianco

Það er alveg ljóst að sumarfrí námsmanna byrjar ekki fyrr en seinasta prófi lýkur.
Sumarið mitt er hafið og ég veit ekki alveg hvernig ég á að hegða mér.
Nálar og sögubækur hafa stjórnað framvindu seinustu þriggja vikna og ég veit ei hvað ég á að gera við þetta nýfengna frelsi. Það hefur þó helst bitnað á veskinu með tilkomu nýrra klossa og sundfata.

Í dag var þó tekið forskot á sæluna og tekinn göngutúr í góða veðrinu.
Þrefalt húrra fyrir sumarfríi!

Febrúar.

2010-02-20T15:01:00.000-08:00

Myndir fengnar af: ebay, etsy, google, topshop.

Tréhús

2010-01-10T12:27:00.000-08:00

Ég er haldin þráhyggju að vista öll tréhús sem ég finn á netinu.
Þau eru orðin sextíu og þrjú talsins.
Maður væri nú nokkuð flottur á því ef maður gæti gripið teppi
og pakka af swiss miss og lagst í dvala frá janúar til mars.

Seinustu Jól Áratugarins

2009-12-28T15:54:00.001-08:00

Gleðileg jól og farsælt komandi ár!
Þó svo að aðfangadagur sé liðinn og skötu/hangikjöts-lyktin horfin þá ætla ég að leyfa
myndum af mér, Ívari og litla fjögur hundruð og fimmtíu ljósa jólatrénu að fljóta með.

Áður En Skólatörnin Hefst

2009-08-17T18:44:00.000-07:00

Grasagarðurinn

2009-08-10T17:44:00.001-07:00

Frjáls eins og fuglinn

2009-05-19T10:45:00.000-07:00

Loksins, LOKSINS, er maður búinn með áfanga annarinnar og kominn með einkunnarspjald undir hönd.
Sumarið er búið að vera fjarlægur draumur innan um títuprjóna og hugtök eins og póstmódernismi. Ég er fangi nýsloppinn úr Auswitch lærdómsins.

Ég er þó búin að afreka ýmislegt á meðan bloggleysi mínu stóð.
T.d. að breyta Íslandi í kommúnistaríki, innheimta fermingar milljónirnar mínar og fara í roadtrip suður jafnt og austur!

Myndir frá Jago79

Sól Sól Skín Á Mig

2009-02-25T16:22:00.000-08:00

Í sumar verð ég og skal finna fallegt gamalt, litríkt eða klassískt hjól með blómakörfu...

Ég mun gefa öndunum brauð reglulega...

Ferðast um Ísland...

Og mun dansa allt sumarið berrössuð á tánum...

Sólarströnd

2009-02-23T13:36:00.001-08:00

Fórum út í fjöru í dag í nístingskulda með regni og sól sem var að rembast við að komast í gegnum skýin.
Það er eins og að koma á aðra plánetu að skoða fjörur, allt gúmmíkennt og sleipt, fjólubláir og appelsínugulir litir innan um grámyglótta steina og rauðar kóngulær trítlandi um.

Enduðum daginn á að éta kjúkling í pestó sem var nokkuð fjörulegur að sjá en algjört om nom nom, fengum uppskriftina af síðunni hennar Jónínu, allir að kíkja þanngað!

Dvel ég í draumahöll...

2009-01-27T14:51:00.000-08:00

Ég myndi ekki flokka mig sem ofur dannaðan kvennmann en ég vil þó að svefnherbergið mitt sé bleikt, hvítt og kremað með blúndum, blómum og öllu tilheyrandi.Ég er þar til nýbúin að flytjast niður á jarðhæðina á heimili mínu (staður sem systkini mín dvöldu líka sem unglingar) og fylgir því svefnherbergi, stofa og eldhús.

Svefnherbergið er langt á leið komið með að vera útúr blómað og blúndað en stefnan er að kaupa Not Rudolf, hreindýrasnagann, búa til fallega himnasæng og jafnvel stela hugmyndinni með gömlu sokkböndunum fyrir ofan rúmið. Vonast ég nú til þess að ég komi þessu öllu í verk eftir að hafa skoðað margar góðar hugmyndir og þar sem ég er líka búin að auglýsa það hér.

Get sagt ykkur það í lokin að meira
segja kærastinn sefur vel í þessari
Marie Antoinette múderingu.

Eirðarleysi

2009-01-21T14:30:00.000-08:00

Meðan fólk kastar skyri í lögregluna niður á Austurvelli sit ég heima og bora í nefið.

Geri eitthvað í þessu á morgun.